Tayri l-lmuḥal

A m-sser yenser d imserri

a zzin amsari

ndeṛ ul-im ad yers kra

mač' akka a tnadiḍ tayri

zzman d imɣurri

nek, ur kem-ɣeddeṛɣ ara

ul' af-i d-ekniḍ yur-i

ttxil-em tixer-i

ṛuḥ, ur kem-uklaleɣ ara

Xas beddel lewhi i wallen-im

ewzen tamuɣli-m

efk-i lehna tettmenniḍ

nadi wi' a yḥerzen temẓi-m

yeklal zzin-im

nek yexḍa-yi ubrid d-bbwiḍ

ugadeɣ arma zdeɣ'ɣ ul-im

at-truḍ zehṛ-im

deg-win izweǧn i d-ɣliḍ

Ḥader zzin-im yettuɣaḍ

ul-iw d asemmaḍ

lexwbaṛ a t-selḍ a m-t-inin

ddunit-iw turez s weqlaḍ

ula' deg-i i teḍmaɛḍ

ṛuḥ at-tnadiḍ wayeḍ-nin

nek yuyzag walleɣ-iw, icaḍ

ɣef ul-iw ablaḍ

ur d-ittakwi ur d-ittiḥnin

Tebɣiḍ-i, bɣiɣ-am leḥsan

a m-ṣeggmen wussan

at-teṛtiḥeḍ ad ṛtiḥeɣ

anef lhemm i win tisaɛn

bnadem ur yuksan

sameḥ-iyi nek ad am-samḥeɣ

ttasmen wulawen ttqassan

qebl ad ttemseḍṣan

fell-aɣ medden, aqel-i ad ṛuḥeɣ