Yir sɣar

Yir sɣar ur t-ttleqqim

Xas yeṛwa ur yettaɣ aẓar

Yir serdun ur t-deqqim

Ur yettɛebbi ur yettwanhaṛ

Yir mdan hdeṛ neɣ qim

D lmuḥal ad yerr aḍar

Ccbaḥa b-wergaz d ssaɛya

Yir rgaz yif-it berru

Ccbaḥa tmeṭṭut d leḥya

Yir meṭṭu yif-itt beṭṭu

Ccbaḥa n zzwaǧ d nniya

Yir zzwaǧ d daɛwessu

Ccbaḥa b-wexxam d dderya

Yir dderya d aɣurru

Nnuql imɣin di terga

Yettnerni am gudu maɛfun

Xas ad yesgem di lǧedra

Aẓar ines d ameɣbun

Akkenni yir dderya

axiṛ aɣyul yir serdun

amdan ma yxuṣ ttṛebga

Mači d leqṛaya a t-yefdun

Yir dderya axiṛ nnger

Wala tilufa, ur nemɛin

Yir lwaldin ul' ayɣeṛ

Axiṛ agujil, meskin

Yir tagmatt, Ṛebbi ad yeṣser

Tugar taɛdawt n tnuḍin

Yir ḥbib, aɛdaw meqqaṛ

Tebniḍ fell-as di tɣalltin

Abdellah Hessas (1990)