Tayri-m

Neṭtleɣ lahmum-iw di lkas

mi yeskeṛɣ a d-ifliwen

mi ɣileɣ ad yifsus layas

asirem iḥebk afriwen

tayri-m i yi-skeṛhen tullas

yenfeln uk tilas 

Ur tt-ibud ḥed i yiwen

Tayri-m d abrid wer nemmal
ur ittfukku ur ixellef
ad ndemɣ ifat lḥal
ad qeddmeɣ lebɣi ixulef
teḍra d wul-iw d lmuḥal
xas yebɣa ad yuɣal
yurez-it lqid u wulef

Ay' teḍra yidi am yifer
yeɣlin deg rebbi b-bwaḍu
lɛaql-iw yezga isufeṛ
lexyal-im yugi a s-yexḍu
mi tɣabeḍ ul-iw yefferfer
s imeṭṭi a kem-iḍfer
amzun assen ar annebḍu

Teǧǧiḍ-d aṭṭan d amessas
ansi i teɛniɣ d asawen
tawla n tayri-m d lweswas
ur qeṭṭaɛn iseflawen
felli yugi ad yali was
ccah ! sebbebɣ-as
uɣeɣ lḥubb s imeṭṭawen

Tin yeḍran yidi, nṭarraɣ
ur zmireɣ ad am-xḍuɣ
lḥubb-im ur s-zmireɣ
sani rriɣ ad am-ḥulfuɣ
mi ldiɣ allen-iw a kem-ẓreɣ
neɣ a kem-id-ṣewwreɣ
mi ten-temdelɣ a kem-arguɣ

Abdellah Hessas (1995)