Nnif d lḥif

Yettɣaḍ wi' iserɣen ur izdim

Yebbwi ddin ur nettwaxlaf

Yettɣaḍ win yeksebn adrim

D ukwerfa yettemkwerfaf

Kra yufan ur yeddim

Ad ittnadi wer yettaf

Yettɣaḍ wi' irfedn agelzim

Di tfexsa ines yessendaf

Yettɣaḍ wi' iẓzlen am 'bhim

Deg walleɣ iccekkeb-it karaf

Argaz ur nezzi ur negzim

Isteḥq-as ad yells llḥaf

Waḥeq kra ihedren ur yendim

D zzit qeṭṭṛen iɣuṛaf

Yettɣaḍ bnadem ur nefhim

Am yiḍ am ass yesseglaf

Yella di lemtel d aqdim

A mdan seg imi i gttwaṭṭaf

Yettɣaḍ wi' iẓzullen ur yaɛlim

"Lḥamdu" amek i ttuṣaṛraf

Yettɣaḍ wi' iɣermen ur yexdim

Ur yeẓri ssebba lxilaf

D aɣyul yettwetn af alim

Ad yeg i temẓin ticcaf

Abdellah Hessas (1995)