Yir zzheṛ

Ṭṭefɣ abrid, lebɣi ur iban

D ṛṛay-iw yetbaan

Ssaɛd ur nesɛi leqṛaṛ

A Ṛebbi ili d wi' iy-icban

S zzehṛ-is yeɣban

Ma ddreɣ ur iban ayɣeṛ

Lahmum deg udem-iw ḍbaan

D ilemẓi aciban

I wumi tuɣzi n laɛmeṛ

Ṭṭefɣ abrid, lebɣi ifaten

D ṛṛay itelfen

F ssaɛd ur nesɛi iɣimi

A Ṛebbi ili d wi' ittewten

S zzheṛ yemmuten

Ma yedder wissen acimi

Lahmum deg udem srewten

Fukken watmaten

Temɣweṛ d ccib i wumi

Ṭṭefɣ abrid lebɣi yaɛṛeq

D ṛṛay-iw, yeḥmeq

Deffir ssaɛd a t-neṭṭef

A Ṛebbi keč d areẓẓaq

Zzehṛ-iw yeɣṛeq

Ma dderɣ ur iban ayɣef

Seg lahmum udem-iw yeḥṛeq

Di temẓi nxeṛṛeq

I wumi ccib d uwellef

Ṭṭefɣ abrid ger wayendin

D ṛṛay yettnadin

F ssaɛd ur nesɛi taddart

A Ṛebbi ili d lmeskin

Di zzehṛ-is yeɣlin

Xas yedder amzun d alaxeṛt

Lahmum deg udem-iw zwin

Ul-iw d amuḍin

I wumi tuɣzi n tudert

Åbdellah Ḥessas (1991)