Qessam

A Qessam tt-ixeṛzen fru-tt

zehhun medden ur fṛiḥeɣ

ḥkiɣ-ak-d tamacahutt

deg meṭṭawen ur d ak-cuḥḥeɣ

wiyyak ! eḍlebɣ-ak lmutt

ammar akken ad ṛtiḥeɣ

Ddunit tebna af ddwam 

am tafat d ṭṭlam

d lmuḥal ad mlilen

albaεḍ ibudd-as Qessam

laḥlal d laḥṛam

anda yufa ad yessisen

nek, lmetl-iw yennaεdam

lḥif d ttexmam

anda ṛuḥen izwar-asen

Annaɣ ay' ɣwezzifḍ a yiḍ !

aεwaz d usemmiḍ

d acu ara yemdeln allen ?

egguniɣ tabburt, llḥiḍ

melmi ara d-εeddiḍ

a Qessam i d iy-ɣullen

i wmur-iw anda t-terriḍ ?

i wumi i t-terniḍ ?

mači d ayen ittuɣalen

Iḍ agi εawzen medden

i wsemmiḍ bedden

ḥkan-as lebɣi i Qessam

kul yiwen ayen i s-d-iḥudden

stekfan, qudden

asaεdi ileḥq-it s axxam

ma d nek, iɣallen-iw cudden

kkawen ifadden

iɣull-i ula di lemnam

Iḍ agi llint tebbura

igenwan meṛṛa

kul yiwen ittṛaju leḥq-is

Qessam d lεid ɣef kra

wiyaḍ ţ-ţameɣra

ttganin deg lerẓaq-is

ma d nek, akka i d iy-ura

laxṣaṣ tamara

laεmeṛ ḥedṛeɣ di ssuq-iq

Iḍ agi igenni iceqqeq

iṣubb-ed a yfeṛṛeq

yal ixef imudd-as ayla

kul yiwen anida i t-yelḥeq

si lɣeṛb ar cceṛq

nek, yerra-yi-d aḍella

tɣeḍleḍ-d fell-i lbeq

ya Qessam larẓaq

i wmur-iw anda yella ?!

Abdellah Hessas (1983)