Ddunit

Llsas n tirrugza d nnif

Kra bwi' illuẓen yeṛwa

D lmuḥal idum lḥif

Mkul aṭṭan ɣur-s ddwa

Acḥal i gzhan lexṛif

Ddan ɛeryan di ccetwa

Labudd yi-bwass ad yecḍaḥ

Wi' irran aḍebbal d aṛfiq-is

Amek ara wehmeɣ yerbaḥ

Wi' isɛan laɛtab d amseweq-is

Laɛǧeb d alɣum ɣef ṣdaḥ

Wammag, amcic d amḍiq-is

Kra yeggulen af ksum

Imceḥ lmeṛqa d wadif

Wi' ittkeln af leḥbab n ccum

Ad yens iḍ dew useqqif

Ma yettmuddu laẓ aɣrum

Ad d-yefk ugudu lexṛif

Ur ttgallaɣ ur ḥennteɣ

Ur ttaɣeɣ zzhu s ddiq

Ur gganeɣ anda ur qegleɣ

Ur tedduɣ d yir ṛfiq

Ma d tamɛict n ddel umasraɣ

D nnefqa bw' ur nettsewwiq

Ur ttnamareɣ lefḥel

Ur ferruɣ ger laɛwayeṛ

Yettban mmis n laṣel

Tagust ur tettak aẓar

Mači d tisseḍsa b wedfel

A s-d-irren iṭij i fuṛaṛ

Ur ttnaɣeɣ d bu yimi

Ayen illan deg-s a yi-t-iḍlu

Ur ttjaṛeɣ d uḥṛaymi

Ur ttsewwiqeɣ s duṛu

Yif-it ṣṣbaṛ, yir mensi

Axiṛ aɛwaz, yir usu

Åbdellah Hessas (1986)