Imnejli

D acu i y-d-igwran assagi

Tamɛict yid-wen t-tamara

Ṛṛeḥl-iw la yettheggi

Ad iyi-ččent tmura

Ad nnejliɣ s-yagi

S anda ur d iy-tettafem ara

Abrid ansi i d iy-ikka

Sani i d iy-ifka

A t-awiɣ mebla axemmem

Ɛallem-lefjer, azekka

Tebɣam-iyi akka

Ad beddleɣ ula d isem

Ma t-tamɛict yid-wen berka !

Axiṛ aẓekka

Wala tamurt tzedɣem

Ad ṛuḥeɣ ur heggaɣ aɛwin

Tita ad iy-awin

Ur d-ttak idim, tedɣel

Lemḥibba n-wen d iyi-rwin

Irgazen t-tlawin

Ur tt-ig Ṛebbi d aḥemmel

Xas fecleɣ, ifadden zwin

Abrid dima d win

Tamuɣli ar deffir tebṭel

Ad ṛuḥeɣ ṛṛwaḥ n terṣaṣt

Irgazen lxalat

Ur ḥwaǧeɣ a yi-d-mmektim

Mḥut isem-iw si taddart

Dayen, ffɣeɣ tajmayt

Win i y-d-ibdern ad t-xeṭṭim

Axiṛ ccraɛ n temrart

Lemḥasba l-laxeṛt

Wala anida tettilim

Hessas Abdellah (1982)