Laman

Ay iɣallen izzan
ifadden-ik yuzan
nnig ṣbeṛ ţ-ţanafa
a ṛṛay-ik yenzan
teɣliḍ di lmizan
effɣent-ak tirga mxalfa
efkan-ak iwzan
alarmi i k-ḥuzan
ṛuḥen-ak a lǧid s ukwerfa

Ay ul-ik yeqqden
imi-k yeffuden
nnig laman d laɣṛuṛ
a ṛṛay iεemden
tenwiḍ ugaden
teddiḍ di lebɣi i laεṛuṛ
efkan-ak irden
alarmi i k-ṣeggden
ṛuḥen-ak a lǧid s usaɣuṛ

Tesselqameḍ imɣi
i lḥif d imenɣi
nnig tuzzma d ineẓman
a win ur nenɣi
yezzan ur neṛɣi
yewεaṛ lexdaε di laman
efkan-ak iɣi
mi i k-ufan lebɣi
ṛuḥen-ak a lǧid s waman

Ay ul-ik yeddben
iles-ik iṛeḍben
nnig laεtab siwa aεtuṛ
a nniyya yselben
ifadden-ik duben
ul' i d ak-d-rran lahduṛ
fkan-ak iḥbuben
alarmi i k-ḥeṛṛben
ṛuḥen-ak a lğid s wemḍuṛ

Abdellah Hessas (2003)