Lucayer n taggara

Yezwi-yi wurrif,
dayen, isbek walleɣ-iw utlif,
ccib si tura,
yesqwecṛ-iyi lḥif,
ddiɣ di lebɣi i wasif,
laεyub tazzwara,
yeffeɣ-iyi wadif,
a ttemdarkaleɣ am ukrif,
ur d-igwri wara.

Rẓag deg-'mi lqut,
yal aṭṭan ad-yesnunnut,
ur tenfiε tuṣṣṛa,
yenneqmaḍ ṣṣut,
tayri-nni taneggarut,
teǧa-d limaṛa,
iban-id ttbut,
ḥulfaɣ a d-steqsi lmut,
tefka-d licaṛa.

Lxaṭeṛ-iw yerwi,
qebbelɣ ayen ur iy-nehwi,
ur ksaneɣ ara,
udem icerw izwi,
laεnaya iṛṛeẓn ur teswi,
ur tettεedd ' ara,
malleɣ asemsawi,
a Ṛebbi dawi, neɣ awi,
aεyiɣ di tmara.

Iɣunza-yi ṣṣbaṛ,
ma d ṛṛay-iw, neɣ d zzhaṛ,
neɣ akka i gura,
liḥala-w tenṭaṛ,
aεwaz rniɣ aḥebbaṛ,
ẓẓayet tnekra,
nnejm-iw yaεmaṛ,
dayen, bbwiɣ-as-d s lexwbaṛ,
tebbeḍ-ed taggara.

Fell-i iεadda lḥal,
asalas n temẓi imal,
tenquqel lqudṛa,
laεqel yenhewwal,
ul-iw ur fell-as leţkal,
tdub ṣṣuṛa,
yekfa seg-i wawal,
eṣṣer laεyub a yakal,
tarewla, tuffra.

Abdellah Hessas (2006)