Amekḥus

Fell-i, dayen, t-tameddit

Ifuk ṭṭmaɛ di lahna

Acu lḥiḍ ur d iy-newwit

Tugi ad iy-tebru lmaḥna

Akka i s-d-cfiɣ i ddunit

Zgiɣ megreɣ-d ttḥatit

Tagara ur iy-d-ṣaḥ tubbit

Mi d-luleɣ i iy-teṭṭef ccaḥna

Ihuzz-iyi dduḥ n lḥif

Sṛeqsent-iyi lemḥayen

D ṣṣebyan heǧaɣ urrif

D lexṣaṣ i yi-d-isneṭqen

Ɣriɣ deg rebbi uɣulif

Jemmelɣ ttṛebga n bessif

Ezgiɣ jbedɣ ar rrif

T-tamara i yi-d-issekren

Luleɣ-d d lḥif d akniwen

T-taluft i yi-gezmen timiṭ

Uradeɣ s imeṭṭawen

S nnehta b-wul i ldiɣ tiṭ

Akukru yurez iɣallen

Ṭlam izedɣ-iyi allen

Layas iger-d acciwen

Deg wsirem ur d-iqqim cwiṭ

A tetten, a ttarraɣ ifeẓ

Deg wayla-w ur iy-d-nṣaḥ

Lhemm deg ul-iw iɣeẓ

Ur zmireɣ ad-iniɣ «aḥ»

Zzehṛ-iw yezga yqulleẓ

Qessam yugi a yi-d-ifṛez

Mi tt-smeckukelɣ at-terreẓ

A laḥbab wergin nefraḥ

Abdellah Hessas (2008)