Yelli...

Je publie et dédie ce poème à mon ami Abderrahmane Halit. J'espère que ce modeste cadeau lui ferait plaisir.

Kkseɣ taduli af dduḥ

Ffeɣn lfuṛuḥ

Ikecm lḥif d leḥzen

Tebbwiḍ-t d lľufan, mecṭuḥ

A lmutt ur ncuḥ

Ur teṛwi deg-s azuzen

Sser i t-izdeɣn iṛuḥ

Ur yegli s ṛṛuḥ

Kwellefɣ-am Ṛebbi εzizen

A Yelli ul-iw ijebden
M' akken i d-am-cehden
Uyseɣ dayen ad yali wass
Yelli mi kem-id-sserden
Widen i kem-issarden
Axxam yezzelz af llsas
Ula d leḥyuḍ-is meğǧden
M' akken i kem-refden
A lmutt tεeddaḍ tilas

A Yelli lεaql-iw iɣab

Mi iy-d-efkan ttwab

Deg-wzal yeɣli-d fell-i ṭṭlam

D kem i d ṛṛaḥa d laεtab

D kem i d laḥbab

Teǧğiḍ-i ur bniɣ fell-am

Lmutt ur d as-giɣ leḥsab

Iεerq-iyi ṣṣwab

Tṛuḥeḍ ur d-ğǧiḍ sslam

A Yelli m' akken teffɣeḍ

Yemma-am txebbeḍ

Tufrareḍ nnig iqweṛṛay

Deffir si rrehba i d-xellfeḍ

Iẓri-w ifeggeḍ

Deg 'mi-w isleqf umeslay

Iεerq-i s anda asiweḍ

Abrid ukw yenneḍ

Leḥzen deg-ul yessefsay

A Yelli m' akken i kem-dlen

Widen i kem-imuqlen

Akken at-tṛuḥeḍ, dayenni !

Refden-kem mi kem-kweblen

S anda ar kem-neṭlen

Temlal tmurt d igenni

Azal akwed yiḍ εedlen

D ṭṭlam ɣef allen

Ttuɣ anwa i d nekkini

A Yelli mi kem-ssersen

Walaɣ ifassen

Ẓẓlen-d a d iyi-kem-awin

Yelli mi neṭqeɣ ɣur-sen

Medden sliɣ-asen

Mi s-nnan "yesleb, meskin"

Ur umineɣ a y-teğǧeḍ ass-en

Armi i yi-ssuysen

Mi rran fell-am timedlin

A Yelli awi' d am-yeḥkan

Skaddebɣ ussan

Γileɣ at-tṛuḥeḍ di laεḍil

Yerra-kem wi' i kem-id-yefkan

Ur yenfiε "lukan"

Ur kem-id-yerri "waḥlil"

Gara-neɣ ur tesεiḍ amkan

D lamana kan

Di lğennet ncalľeh an-nemli
 
A Yelli i yi-bḍan bessif
I y-d-iğan urrif
Temmuteḍ, ifadden-iw kerfen
Ad cfuɣ 'af ass-en l-lḥif
Deg-walleɣ-iw utlif
Ur t-ssiriden isaffen
Teǧğiḍ-d lxiq d uɣulif
Lxaṭeṛ ishetrif
Wamma lahna i ɣ-icaεfen

A Yelli, Ẓẓulleɣ uẓameɣ
Ekkerɣ qqimeɣ
Ḥdaqeṛɣ ur d-uɣaleḍ
A Yelli hdeṛɣ ssusmeɣ
Uyseɣ ssarmeɣ
Ḍemεaɣ deg-m a d iy-d-sleḍ
Fell-am tiẓeṭ yukw ḥaṛṛmeɣ
Ula ma ḍelmeɣ
Kullec rẓag seg-mi i tṛuḥeḍ

A Yelli iẓri-w yennaεdam
Wammag-in yemma-m
Tedderɣel seg meṭṭawen
D kem i tḥemmel i tessaram
Laεtab-is fell-am
Xas ma tesεa-d akniwen
A Yelli i y-zedɣen lemnam
Tmelk-iyi ṣṣuṛa-m
Ur d iy-ittṣebbir yiwen

A yelli yis-em talwit

D kem i d ddunit

S usirem deg-m ay ddreɣ

Fell-am ṛamḍan taẓallit

Ṣbaḥ, tameddit

Ma sɛiɣ di lǧennet, umasraɣ

Mer teqqimeḍ t-tilemẓit

Ad tedduḍ t-tislit

Lfeṛḥ-im ad as-ḥedṛeɣ

A Yelli tattalt nru-tt
Mazal deg-s lmutt
Rriḥa ines d asenṭi
Tabburt terriḍ nettṛaju-tt
Tebbwiḍ tasarutt
Mendaṛ, teẓriḍ neɣ xaṭi
Lmutt-im t-tamacahutt
Ar ass-a nḥekku-tt
I win yectaqen imeṭṭi

Abdellah Hessas (1977)