Yir ṛṛay

Ɣur-k at-tlummeḍ di medden

Ma tefkiḍ lebɣi i ṛṛay-ik

Ḥader ifassen-ik a ttcudden

A tt-tefsiḍ s wuglan-ik

Ddunit d wi' ibedden

Agma ɛzizen lli-d allen-ik

D ṛṛay-ik i d bulahmum

S tlufa-k ar' tettwaɣeḍ

Kra bw-anda yḍaɛ wemcum

Ger iḍarren-is temṛaṛɣeḍ

Tenwiḍ aḥbib a k-idum

Win tufiḍ deg-s at-temmɣeḍ

Tlaɛbeḍ s tmes d ccum

Yi' bw-ass labudd at-terɣeḍ

Teḥṣiḍ isehl unekcum

At-tḥezzebḍ i ma teffɣeḍ

Åbdellah Ḥessas (1999)