Ma tṛuḥeḍ...

Ma tṛuḥeḍ nṭaṛṛaɣ
ma teqqimeḍ akteṛ
d leḥsab-iw mi i kem-xtaṛeɣ
i d-iḍḥan yexsaṛ
ma ruɣ anwa ar' a ɣiḍaɣ
ur yenfiε sbaṛ

 S zzyaṛa qesdeɣ lecyax
a d-aruɣ lḥarz n ssmax
a d-yuɣal weḥbib
nniyya-w yeṣfan tewsax
tayri-w ɣer yidis teclax
yeffeɣ-ed deg-s lεib
tṛuḥ temẓi-w di tkellax
ur faqqeɣ ibbwi-yi wesyax
ar mi iy-ičča ccib
telfaɣ, lεeql-iw yettnax
dubeɣ,tazmert a tfettax
d kem i d ṭbib


Mači d yiwet ad as-knuɣ
lemmer d ayen ar ad-ḥyuɣ
at-tεiwed anaεmuṛ
ɣer lmutt i la tedduɣ
ur d-iqqim ara d-efduɣ
di temẓi m-leɣṛuṛ
tin akken af' i cweḍɣ ttruɣ
xas iṣaḥḥ-iy-d at-tebḍuɣ
ur seεuɣ amur
ay ul-iw anda a k-eṛmuɣ ?
yiwen deg-s ur ttlummuɣ...
d keč ay d ugur


Abrid nni i d-nemsaεaf
nxulef-it ur nemxallaf
ma tefhemḍ kra ?
widen tɣileḍ ass-a a ten-naf
kul yiwen amek yesseglaf
w' ur taεni yeẓṛa !
imi nnif yegwra-d di llḥaf
eṣbaṛ kan amcum ad-t-taf
g-asen tameɣra
ma d nek, eqqdent-i ticcɛaf
ennesraɣ-d si ger iɣuṛaf
ur ḥeddeṛɣ ara


Sameḥt-iyi a wid ḥemmlaɣ
lemḥibba deg-ul teṛɣwel
tabburt l-lebɣi at-tmedlaɣ
tiṭ a kwen-ijjmen, tedderɣel
ur qbileɣ, ur ttqabaleɣ
ur ḥeddeṛɣ i yir ccɣwel
mači t-tarewla ay rewlaɣ...
tebbeḍ ɣer wejmam...tennɣel

Abdellah Hessas (2002)