Éclats de rime

  Leqdeṛ yemṛarɣen, yerwi Ula d wur neswi Yeṭturrec deg-i la ynebbec A neḥemmel ayen ur d aɣ-nehwi A nebɣu ur nenwi Kulc lɛib ad-yesṭuṭtec A Ṛebbi dawi neɣ awi Aɛyiɣ di dwawi Yečča-yi uḥebbeṛ af kullec

Yir sɣar ur t-ttleqqim Xas yeṛwa ur yettaɣ aẓar Yir serdun ur t-deqqim Ur yettɛebbi ur yettwanhaṛ Yir mdan hdeṛ neɣ qim D lmuḥal ad yerr aḍar

S wannuz u ṭaɛa anerzu Di lahna nneɣ iwwet iɣisi Ddunit deg-neɣ tettazu Laxeṛt tugi ad-steqsi D Ṛebbi, d kunwi ay nettṛaju A ṣellaḥ deg "at ɛisi"

Ẓzay webrid ɣer lǧiha-m Kra lḥiɣ ndemeɣ deg-s Rẓaget lhedṛa fell-am Isem-im igezzem-iyi iles Ass mi sliɣ tgiḍ axxam Ay hennaɣ ṛwiɣ iḍes Nfiɣ udem-im si lemnam Lexyal-im friɣ yid-s

Ɣur-k at-tlummeḍ di medden Ma tefkiḍ lebɣi i ṛṛay-ik Ḥader ifassen-ik a ttcudden A tt-tefsiḍ s wuglan-ik Ddunit d wi' ibedden Agma ɛzizen lli-d allen-ik

Yegla usaɛdi s usexḍi Lemḥibba yefra ssuq-is Yuɣal ddraɛ d lqaḍi Wi' irnan wayeḍ ičča laḥq-is Di lxiṛ wer d-igwri maḍi Cceṛ yettaɣ-ed amḍiq-is Negwra-d di zzman d aqeḥḍi Lukan tengir d lweqt-is

Abbuh ! aqel-aɣ nebbuṣa nettru armi neḍṣa taḍṣa l-lxiq tugar lmutt gar-awen ṛṛaḥba tarṣa a laḥbab neḥṣa terram-aɣ t-tamacahutt

Am ek ara yexḍu i ssiyya Win yettɛicin di ssiyyat Ula d aḍebbal dɣa Ad yettu ahuzzu n tuyat Win yemɣunzan d leḥya Werǧin iḥezzeb i tifrat Xas ad yeddari nniyya Yettban usigna s' tekkat

A yaxxam deg i luleɣ Ay' laɛbeɣ di leḥnaḍ-ik Ttwetɣ, zziɣ, lluẓeɣ Rran-iyi-d leḥyuḍ-ik Tecfiḍ-iyi amek i d-kkreɣ Am yiwen seg-warraw-ik Akken bɣuɣ lhiɣ, xuṣseɣ KṚEHN-IYI IMAWLAN-IK

Yeṭṭef-iyi zman cceḥna Yeẓẓel iḍarren deg-i layas Amendeṛ a y-tebru lmeḥna Yib-ass fell-i ad yali wass A yiḍ ṭṭes di lahna Aqel-i fell-ak d aɛessas